ပြင်ဦးလွင်

ပြင်ဦးလွင်မြို့ရဲ့ လတ်တလော အိမ်ခြံမြေဈေးကွက်မှာ တန်ဖိုးမြင့် အိမ်ခြံမြေတွေ အရောင်းအဝယ်မဖြစ်သလောက် နည်းပါး နေပြီး ကျပ်သိန်း ၅ဝဝ နဲ့ ကျပ်သိန်း ၁,ဝဝဝ ကြား အိမ်ခြံမြေတွေကိုသာ စိတ်ဝင်စားမှုများကြောင်း ပြင်ဦးလွင်က အိမ်ခြံမြေအကျိုးဆောင်တချို့ဆီက သိရပါတယ်။

ငါးနှစ်ကျော် အရောင်းအဝယ်ငြိမ်သက်နေတဲ့ ပြင်ဦးလွင်အိမ်ခြံမြေဈေးကွက်ဟာ မန္တလေးအိမ်ခြံမြေဈေးကွက်နဲ့လည်း ဆက်စပ်မှုရှိပါတယ်။ မန္တလေးမှာ အိမ်မြေအရောင်းအဝယ်လိုက်လာပြီဆိုရင် ပြင်ဦးလွင် မြေဈေးကွက်လည်း လှုပ်ခတ်လာတတ်ပါတယ်။ လတ်တလောမှာ မန္တလေးမြေဈေးကွက်ကလည်း တန်ဖိုးသင့်တဲ့ အိမ်မြေအကွက် အကွင်းတွေသာ အားထားနေရသလို ပြင်ဦးလွင်မှာလည်း အထူးသဖြင့် ကျပ်သိန်း၅,ဝဝဝ အထက်ဆိုရင် သိသိသာသာအရောင်းအဝယ်အေးနေပါတယ်။

ပြင်ဦးလွင်မြို့မှာ အိမ်ခြံမြေဈေးနှုန်းတွေအနေနဲ့ မြို့တွင်းအဓိကကျတဲ့ မန္တလေးလားရှိုးလမ်းလို နေရာတွေ၊ကန်တော်ကြီးတစ်ဝိုက် နေရာကောင်းတွေမှာ မြေအကျယ်အဝန်းကိုလိုက်ပြီး ဈေးနှုန်းတွေက ကျပ်သိန်း ၁ဝ,ဝဝဝ ကနေ ကျပ်သိန်း ၂ဝ,ဝဝဝ အတွင်း အမျိုးမျိုး ရှိနေပါတယ်။

မြို့အတွင်းပိုင်းကျတဲ့ လမ်းတွေမှာတော့ ကျပ်သိန်း ၁,ဝဝဝ နဲ့ ကျပ်သိန်း ၃,ဝဝဝ ကြား ဈေးခေါ်နေပြီး မြို့တွင်းနဲ့ လှမ်းတဲ့ မြို့သစ်အပိုင်းတွေမှာ ကျပ်သိန်း ၅ဝဝ ဝန်းကျင်ဈေးနှုန်းသာ ရှိပါတယ်။

အရောင်းအဝယ်အေးနေတာကြောင့် ကျပ်သိန်း ၁,ဝဝဝ ပတ်ချာလည်ဈေးနှုန်းတွေထဲမှာ အရင်လို ဈေးနှုန်းကို တင်းမခံဘဲ အလျှော့အတင်းလုပ် ရောင်းချတာတွေရှိတာမို့ ဝယ်သူတွေအတွက်တော့ အချိန်ကောင်း ဖြစ်နေပါတယ်။

copy @ myanmartimes